HRUAITU ROPUI PAHNIH INZAWMNA MAK DANGLAM

 

*HRUAITU ROPUI PAHNIH INZAWMNA MAK DANGLAM*
_(Khuanu ruat sa nge thil intawng fuh palh ve hrim hrim?)_

*— Sangtea Chhakchhuak Vâl*

_*He thil mak tak mai hi sawi a ni teh châwk a, tuntumah hian chipchiar deuhhlek zawkin i han sawi nawn dawn teh ang u. Chumi thu chu engdang nilovin United States of America President lo ni tawhte zinga ropui ber ber pahnih — Abraham Lincoln leh John Fitzgerald Kennedy te pahnih inanna mak danglam tak mai hi a ni.*_

1) Abraham Lincoln kha kum 1860 November ni 6-ah America President 16-na atana thlan tlin a ni a, JFK kha President 35-na atan 1960 November ni 8-ah thlan tlin a ni. An inkarah kum 100 chiah a tla a ni.

2) US President zingah Negro (midum) ho hmangaihtu leh an tana sûlsutu pawimawh an ni ve ve a, Negro ho an hmangaih vangin an pahnih hian kahhlum an ni ve ve bawk.

3) An pahnih hian Zirtawpni-a thah an ni ve ve a, hei vang hian mi tam tak chuan Zirtawpni hi ‘vanduaina ni’ angah an ngaih phah bawk.

4) An pahnih hian an tukhuma kah an ni ve ve.

5) White House-a an chên laiin an fa sên an thi ve ve.

6) Lincoln kha Ford company ho lemchanna (theatre) ah kahhlum a ni a, JFK kha Ford company motor-a a chuang lai kahhlum a ni thung.

7) Anmahni thlaktu, an Vice President te kha ‘Johnson’ tih hming pu ve ve an ni a. Lincoln-a Vice kha Andrew Johnson a ni a, JFK-a Vice ve thung chu Lyndon Johnson a ni. Andrew Johnson leh Lyndon Johnson te hming hawrawp hi number 13 ve ve an ni. Number 13 hi number vanduai ah mi tam tak chuan an ngai nghe nghe.

8) Anmahni kaphlumtute hming pawh hawrawp 15 ve ve an ni. Lincoln kaphhlumtu kha John Wilkes Booth a ni a, JFK kaphlumtu chu Lee Harvey Oswald a ni.

9) Lincon thattu Booth-a kha kum 1839-a piang a ni a, Kennedy kaphlumtu Oswald chu kum 1939-a piang a ni thung. Kum 100 dan chiah bawk.

10) President ropui pahnihte thattute kha chhimlam mi, mi firfiak ve ve an ni a. President an kah hnu lawkah man nghal an ni ve ve na chungin; an chungthu rêl fel a nih hmain kahhlum an ni ve ve bawk.

11) Lincoln tih leh Kennedy tih hi hawrawp 7 ve ve an ni.

12) Booth-a khan Lincoln-a kha ennawm chhuahna (theatre) ah a kap a, bungraw dahkhawmna hmunah a tlanchhiain a biru a. Oswald-a khan Kennedy-a kha bungraw dahkhawmna hmun atangin a kap a, theatre-ah a tlanchhe ve thung.

13) Lincoln thlâktu Andrew Johnson kha kum 1808-a piang a ni a, Kennedy thlâktu Lyndon Johnson kha kum 1908-a piang a ni thung. Kum 100 dan chiah bawk.

14) Lincoln-a personal secretary chu “Kennedy” tih hming pu a ni ve a. A thih dawn ni ah khan a secretary chuan ennawm chhuahna (theatre) ah kal lo turin a theihpatawpin a ngen nasa mai a, “Mr.President, khawngaih takin theatre ah chuan kal lo hrâm rawh. Indona (civil war) a zo hlim hlawt chauh a la ni a, hmelma i ngah ang tih hre reng ta che. I kal chuan i va thih phah hial maithei asin; nizana ka mumang a tha lo lehnghal a nia!” a ti a. Mahse President chu a kal lui a, a va thih phah ta a.

15) Kennedy pawhin a secretary te zinga pakhat, “Lincoln” tih hming pu a nei ve bawk a. Ani pawh chuan President chu Dallas khawpuia kal hrih lo turin a thiam ang tawkin a ngen ve nasa a, mahse President chu a kal luih avangin a va thih phah ta nge nge a ni.

16) President pahnihte kha kahhlum an nih laiin an bulah an nupuite an thu ve ve a, an thluak leh thisen chu an nupuite mal chungah a baw nuaih ve ve a ni. An bula thu Governor pahnihte pawhin hliam an tuar ve ve bawk.

17) An aiawhtu te kha chhim lampang atanga rawn chawr chhuak ve ve an ni bawk.

18) President pahnihte khan thah tumtu an awm a nih chuan engti kawng maha pumpelh theih an nih dawn loh thu an sawi ve ve a. An sawi ni chiah chiahin thah an ni ve ve bawk.

19) President pahnihte kha America inpumkhatna tur atana sûlsutu langsar an ni ve ve.

20) Tun thlenga US President ni tawh zinga ropui ber bera chhal an ni ve ve.

Heti ang khawpa hruaitu hmingthang pahnih inanna tam leh maksak tak hi siamtu remruat sa thlap nge ni anga, thil thleng inmil palh ve hrim hrim (coincidence) tih chu mithiamte inhnialna chawk chhuaktu leh tun thlenga an la hrilhfiah theih loh, thilmak a tling a ni.//.